చెన్నై న్యూస్ ఏఐఏడీఎంకే సీనియర్ నాయకుడు, తొమ్మిది సార్లు ఎమ్మెల్యేగా సేవలందించిన కె.ఎ. సెంగొట్టయన్ రాజకీయ పరిణామాలు తమిళనాడులో కొత్త సుడిగుండాన్ని రేపాయి. జయలలిత మరణం తరువాత నుంచి ఏఐఏడీఎంకేలో అంతర్గత విభేదాలు తీవ్రంగా చెలరేగిన నేపథ్యంలో, పార్టీ ప్రధాన కార్యదర్శి ఎడప్పాడి పళనిస్వామితో ఆయనకు విభేదాలు నెలకొన్నాయి.
ఏఐఏడీఎంకే నుంచి తొలగింపు
పార్టీ నుంచి వేరుపడ్డ నేతలను తిరిగి ఏకం చేయాలన్న సెంగొట్టయన్ డిమాండ్‌ను పార్టీ నాయకత్వం తీవ్రంగా వ్యతిరేకించింది. దీనిపై అసహనం వ్యక్తం చేసిన ఎడప్పాడి పళనిస్వామి, సెంగొట్టయన్‌ను తొలుత పార్టీ పదవుల నుంచి, తర్వాత పూర్తిగా పార్టీ నుంచి బహిష్కరించారు. ఆయన అనుచరులను కూడా అదే విధంగా పార్టీ నుంచి తొలగించారు.
తేవర్ జయంతి – కీలక భేటీలు
పసుంపోన్‌లో జరిగిన ముత్తురామలింగ తేవర్ జయంతి వేడుకల్లో సెంగొట్టయన్, శశికళ, ఓ.పన్నీర్‌సెల్వం, టి.టి.వి. దినకరన్‌లతో కలిసిన విషయం పెద్ద చర్చనీయాంశమైంది. పార్టీ ఏకీకరణపై తాను మాట్లాడినట్లు ఆయన విలేకరులతో చెప్పడంతో సంఘటనలు వేగంగా మారాయి.
ఎమ్మెల్యే పదవికి రాజీనామా
గత కొన్ని రోజులుగా సెంగొట్టయన్ విజయ్ నేతృత్వంలోని **తమిళ వెట్రి కలగం (టి.వి. కె .)**లో చేరబోతున్నారనే వార్తలు హాట్‌టాపిక్‌గా మారాయి. అయితే దీనిపై ఆయన నేరుగా స్పందించలేదు.
అయినా, ఈ ఊహాగానాలకు ముగింపు పలుస్తూ నిన్న ఉదయం ఆయన అకస్మాత్తుగా తన ఎమ్మెల్యే పదవికి రాజీనామా చేశారు. సచివాలయంలోని స్పీకర్‌ను ప్రత్యక్షంగా కలసి తన రాజీనామా లేఖను అందజేశారు. అనంతరం, చెన్నై అల్వార్‌పేటలోని తన ఇంట్లో మద్దతుదారులతో సమావేశమై, తన కారుపై ఉన్న ఏఐఏడీఎంకే జెండాను తొలగించారు.
విజయ్ నివాసంలో 2 గంటల కీలక చర్చ
నిన్న సాయంత్రం సెంగొట్టయన్, విజయ్ పట్టినపాక్కంలోని ఇంటికి వెళ్లి దాదాపు రెండు గంటలపాటు చర్చలు జరిపినట్లు సమాచారం. రాజకీయ పరిస్థితులు, భవిష్యత్ ప్రణాళికలపై ఇద్దరూ విస్తృతంగా చర్చించినట్లు వర్గాలు చెబుతున్నాయి.
టి. వి. కె.లో అధికారికంగా చేరిక
ఈ ఉదయం, సెంగొట్టయన్ తన మద్దతుదారులతో కలిసి పనయూరు ప్రాంతంలోని టి. వి కే. కార్యాలయాన్ని సందర్శించారు. అక్కడ పార్టీ నాయకులు ఆయనకు స్వాగతం పలికారు. అనంతరం, మాజీ ఎంపీ సత్యభామతో పాటు 50 మందికి పైగా మద్దతుదారులతో కలిసి సెంగొట్టయన్ అధికారికంగా టివికెలో చేరారు.
ఎగ్జిక్యూటివ్ కమిటీ చీఫ్ కోఆర్డినేటర్‌గా నియామకం
సెంగొట్టయన్‌కు టి.వి కే.లో కీలక పదవి కేటాయించబడింది. ఆయనను పార్టీ ఎగ్జిక్యూటివ్ కమిటీ చీఫ్ కోఆర్డినేటర్‌గా నియమించినట్లు నమ్మదగిన వర్గాలు వెల్లడించాయి. అదేవిధంగా,
కోయంబత్తూరు, ఈరోడ్, తిరుప్పూర్, నీలగిరి జిల్లాలకు సంస్థ ప్రధాన కార్యదర్శిగా బాధ్యతలు అప్పగించినట్లు సమాచారం.
ఇంకా మరికొందరు నేతల చేరిక
సెంగొట్టయన్‌తో పాటు పుదుచ్చేరి బీజేపీ మాజీ అధ్యక్షుడు సామినాథన్, కారైకల్ మాజీ ఎమ్మెల్యే హసనా కూడా విజయ్ సమక్షంలో టి.వి కేలో చేరినట్లు సమాచారం.
