ఫెంచల్ తుపాను కారణంగా చెన్నై నగరం భారీ వర్షాలు, ఈదురు గాలులతో తల్లడిల్లింది. తుపాను మామల్లపురం-పుదుచ్చేరి మధ్య అర్థరాత్రి తీరం దాటిన తర్వాత వర్షపాతం క్రమంగా తగ్గుముఖం పట్టింది.
నిన్న ఉదయం నుంచి చెన్నైలో భారీ వర్షాలు కురవడంతో జనజీవనం అస్తవ్యస్తమైంది. తుపాను తీవ్రతను దృష్టిలో ఉంచుకొని విమానాశ్రయ అధికారులు విమాన సర్వీసులను తాత్కాలికంగా నిలిపివేయాల్సి వచ్చింది. వాతావరణ పరిస్థితులు మెరుగుపడడంతో ఈరోజు తెల్లవారుజామున 4 గంటలకు సేవలు పునరుద్ధరించనున్నట్లు ప్రాథమికంగా ప్రకటించారు.
అయితే తుపాను తీరం దాటిన తర్వాత పరిస్థితులు చక్కబడటంతో ముందుగానే, తెల్లవారుజామున 1 గంటకు విమాన సర్వీసులు తిరిగి ప్రారంభమయ్యాయి. దాదాపు 13 గంటల విరామం తర్వాత విమానాలు సజావుగా నడుస్తున్నాయి.
తుపాను కారణంగా జరిగిన నష్టాన్ని అంచనా వేసే పనిలో అధికారులు నిమగ్నమై ఉన్నారు. వాతావరణ శాఖ చెన్నై, పరిసర ప్రాంతాల్లో వర్షపాతం మరింత తగ్గుతుందని పేర్కొంది.
