టి నగర్ న్యూస్ :తమిళనాడు ముఖ్యమంత్రి ఎం.కె. స్టాలిన్ తన చరిత్ర ప్రేమ, సంస్కృతి పరిరక్షణ పట్ల చూపుతున్న నిబద్ధత తెలుగు పాలకులకూ పాఠం కావాలి. సింధూ నాగరికత ఆనవాళ్లను గుర్తించి, వాటి వెనుక దాగి ఉన్న చరిత్రను వెలికితీసేందుకు ఆయన తీసుకున్న చర్యలు ప్రశంసనీయం, తమిళనాడు తెలుగు యువశక్తి వవస్థాపక అధ్యక్షుడు కేతిరెడ్డి జగదీశ్వరరెడ్డి ఒక ప్రకటన లో తెలిపారు .పురాతన వస్తువులపై పరిశోధనలకు రూ. 8 కోట్లు నజరానా ప్రకటించడమే కాకుండా, తన రాష్ట్ర చరిత్ర, సంస్కృతి పునర్నిర్మాణంలో ఆసక్తి చూపుతున్న ఆయన ముందు మనం మన చరిత్రకు తీసుకునే బాధ్యతలపై ఆత్మపరిశీలన అవసరం.
తమిళనాడు పురావస్తు శాఖ వైఖరి – ప్రేరణగా నిలిచే చర్యలు
తమిళనాడు పురావస్తు శాఖ సింధూ నాగరికత కాలం నాటి వస్తువులను తవ్వి వెలికితీస్తూ ఉత్తర, దక్షిణ భారతాల మధ్య సంబంధాలను నిరూపించే ఆధారాలను అందిస్తోంది. ఈ తవ్వకాల్లో మూడు వేల ఏళ్ల కిందటి సామాన్లు, లిపి, సాంస్కృతిక చిహ్నాలు బయటపడ్డాయి. ముఖ్యమంత్రి స్టాలిన్ ఈ పరిశోధనలను ప్రోత్సహించేందుకు విశేష నిధులను కేటాయించడమే కాకుండా, వాటిని రాష్ట్ర చరిత్రకు అన్వయించుకోవాలని కలలుగొంటున్నారు.
తమిళుల చరిత్రకు సంబంధించి వెలుగులోకి రావొచ్చే అంశాలు:
తమిళ లిపి అత్యంత ప్రాచీనమని నిరూపించే ఆధారాలు.
రెండు, మూడు వేల ఏళ్ల కిందటి తమిళ చరిత్ర, ద్రవిడ సంస్కృతికి సంబంధించిన నిర్దిష్ట సాక్ష్యాలు.
ఉత్తర ద్రవిడ సంస్కృతికి సంబధించిన అక్షరమాలలపై వివరణాత్మక పరిశోధనలు.
లేని ఆర్య-ద్రవిడ సిద్ధాంతాలను కూలద్రోశించే చారిత్రక సత్యాలు.
తెలుగు చరిత్రలో కనిపించని చింతన
తమిళ మూలాలను వెలికితీసేందుకు వారు చూపుతున్న తపనను చూస్తే, మన తెలుగు పాలకుల దగ్గర అంతటి చరిత్రాభిమానమేదీ కనిపించడం లేదు.
ఇక మన చరిత్రపైనే దృష్టి పెడితే:
ఖండవల్లి లక్ష్మీరంజనం, మల్లంపల్లి సోమశేఖర శర్మ, సురవరం ప్రతాపరెడ్డి వంటి పండితులు రచించిన పుస్తకాలను మనం తగినంతగా పరిశోధించలేకపోతున్నాం.
తెలుగు భాష, జానపద గేయ సాహిత్యం, సంస్కృతి పునాదులపై పరిశోధనలు గణనీయంగా తగ్గిపోవడం కనిపిస్తోంది.
చరిత్రకారులుగా పేరొందిన భద్రిరాజు కృష్ణమూర్తి, బూదరాజు రాధాకృష్ణ వంటి వారు చెప్పిన పరిశోధనల ప్రాముఖ్యాన్ని మనం విస్మరిస్తున్నాం.
పాపులర్ కల్చర్‌కు ప్రాధాన్యం – చరిత్రకు తిరస్కారం
తెలుగు సినిమా, పాటలు అంతర్జాతీయంగా గుర్తింపు తెచ్చుకున్నా, మన భాషా సంస్కృతికి సంబంధించి అంతగా పునర్జీవన ప్రయత్నాలు జరగడం లేదు.
చిత్తూరు యాసలో పుష్ప 2 వంటి సినిమాలు రికార్డు వసూళ్లను సాధిస్తున్నప్పటికీ, ఆ యాస వెనుక దాగి ఉన్న భాషా శోభ, తమిళ ప్రభావం గురించి చర్చ తక్కువగా జరుగుతోంది.
మన నాటు పాట ఆస్కార్ అవార్డును గెలుచుకున్నా, తెలుగు భాష అంతర్జాతీయంగా గుర్తింపు పొందే స్థాయిలో కృషి జరగడం లేదు.
తెలుగు పాలకులకు సూచన
మన పాలకులు చరిత్ర, భాష, సంస్కృతి పునర్నిర్మాణంపై దృష్టిపెట్టాల్సిన అవసరం ఉంది.
ప్రాచీన ఆధారాలను వెలికితీసేందుకు తమిళనాడు వంటి తవ్వకాలు చేపట్టడం.
చరిత్రపరమైన పుస్తకాల అధ్యయనానికి, పరిశోధనలకు నిధులు కేటాయించడం.
తెలుగు భాషకు సంబంధించిన వైనాలు వెలుగులోకి తేవడం.
స్టాలిన్ తీసుకున్న చర్యలు మనకు మార్గదర్శకంగా నిలుస్తాయి. మరి మన పాలకులు తమ సొంత చరిత్రను కాపాడుకునే ప్రయత్నం ఎప్పుడు చేస్తారో చూడాలి.
స్టాలిన్ గారూ!
ఇంకో ఎనిమిది కోట్లు మీరే ఉదారంగా ప్రకటించి…ఏ తమిళనాడు క్రిష్ణగిరి దగ్గరో తవ్వకాలు జరపమనండి! మా తెలుగు చరిత్ర కూడా కచ్చితంగా ఎంతో కొంత దొరకకపోదు. పైగా ఆరోజుల్లో మనం కలిసే ఉన్నాం. మేమిక్కడ సినిమా బెనిఫిట్ షో, టికెట్ల రేట్ల పెంపు, ఊపిరాగే అభిమానుల మధ్య ఉక్కిరిబిక్కిరి బిజీగా ఉన్నాము.
తెలుగు ప్రేక్షకుల జేబుల్లో చేతులుపెట్టి మొదటి ఆటకే వెయ్యి కోట్లు లాగేసే అధికారిక దోపిడీ పనుల్లో తీరికలేకుండా ఉన్నప్పుడు… తెలుగు భాషకో, తెలంగాణాకో వెయ్యేళ్ల చరిత్ర ఉంటే మాకేమిటి? రెండువేల ఏళ్ళ చరిత్ర ఉంటే మాకెందుకు? అదేమన్నా మాకు కూడు పెడుతుందా? గూడు కడుతుందా? కనీసం ఒక్క సినిమా బెనిఫిట్ షో టికెట్ అయినా సంపాదించిపెట్టగలుగుతుందా?
