క్యాన్సర్‌ను జయించే దిశగా ప్రపంచ వైద్యరంగం కీలక ముందడుగు వేస్తున్న సమయంలో, రష్యా అభివృద్ధి చేసిన ప్రపంచంలోని తొలి క్యాన్సర్ వ్యాక్సిన్ "ఎంటెరోమిక్స్" (Enteromix) ఉపయోగించే అవకాశాన్ని భారత యువకుడు పొందనున్నాడు.

ఉత్తర్‌ప్రదేశ్‌లోని లక్నోకు చెందిన 19 ఏళ్ల అంష్‌ శ్రీవాస్తవ నెలలుగా ప్రాణాంతక క్యాన్సర్‌తో పోరాడుతున్నాడు. అతని చికిత్స కోసం తీవ్రంగా ప్రయత్నిస్తున్న కుటుంబానికి చివరకు రష్యా ప్రభుత్వ స్పందన రూపంలో ఆశ కిరణం దర్శనమిచ్చింది.

రష్యా నుంచి అధికారిక లేఖ – అంష్ కేసుకు పచ్చజెండా

అక్టోబర్ 27, 2025 తేదీతో రష్యా ప్రభుత్వం అంష్‌ కుటుంబానికి పంపిన అధికారిక లేఖలో,
అతని కేసును రష్యా ఆరోగ్య మంత్రిత్వ శాఖకు పరిశీలన కోసం పంపించినట్లు స్పష్టంగా పేర్కొంది.

ఈ లేఖపై రష్యా పౌర వినతుల విభాగంలోని ప్రధాన సలహాదారు సంతకం చేయడం విశేషం. దీతో అంష్ కేసు అధికారికంగా ముందుకు వెళ్లింది. అనుమతి లభిస్తే, అంష్‌ భారతదేశంలో క్యాన్సర్ వ్యాక్సిన్‌ను క్లినికల్ ట్రయల్ రూపంలో పొందనున్న మొదటి వ్యక్తి అవుతాడు.

తల్లిదండ్రుల ఏడాది రోజుల పోరాటం

అంష్ తల్లిదండ్రులు మనూ కుమార్ శ్రీవాస్తవ మరియు కంచన్ లతా, తమ కుమారుడి కోసం గత ఏడాది నుంచి భారత, రష్యా ప్రభుత్వాలకు అనేక లేఖలు రాశారు.
వారు రష్యా నేషనల్ మెడికల్ రీసెర్చ్ రేడియాలాజికల్ సెంటర్, ఎంగెల్హార్డ్ ఇనిస్టిట్యూట్ ఆఫ్ మాలిక్యులర్ బయాలజీ కలిసి అభివృద్ధి చేసిన Enteromix క్లినికల్ ట్రయల్లో అంష్‌ను చేర్చాలని విజ్ఞప్తి చేశారు.

ఒక జాతీయ మీడియాలో కథనం వెలువడిన తర్వాతే ఈ కేసు అంతర్జాతీయ దృష్టిని ఆకర్షించిందని తెలిసింది.

“డాక్టర్లు ఇక ఏం చేయలేమని చెప్పినప్పుడు ఈ వ్యాక్సిన్ మా చివరి ఆశలా నిలిచింది. దేవుడు మా ప్రార్థనలు విన్నాడనిపిస్తోంది”
అని అంష్‌ తల్లి కంచన్ లతా భావోద్వేగంతో తెలిపారు.

ఎంటెరోమిక్స్ అంటే ఏమిటి? – క్యాన్సర్‌పై 100% స్పందన

Enteromix రష్యా శాస్త్రవేత్తలు అభివృద్ధి చేసిన mRNA ఆధారిత క్యాన్సర్ వ్యాక్సిన్.
ఇది COVID-19 mRNA వ్యాక్సిన్ల టెక్నాలజీ తరహాలో పనిచేస్తుంది.

✔ శరీర రోగనిరోధక వ్యవస్థను యాక్టివేట్ చేసి
✔ ట్యూమర్ కణాలను గుర్తించి నాశనం చేస్తుంది.

ప్రాథమిక పరీక్షల్లో:

కోలోరెక్టల్ క్యాన్సర్ ఉన్న 48 మంది రోగులపై ఉపయోగించారు

100% ట్యూమర్ ప్రతిస్పందన వచ్చింది

ఎటువంటి సైడ్ ఎఫెక్ట్స్ లేవు
ఈ ఫలితాలను 2025లో సెయింట్ పీటర్స్‌బర్గ్ ఇంటర్నేషనల్ ఎకనామిక్ ఫోరంలో ప్రకటించారు.

నిపుణుల ప్రకారం,
భవిష్యత్తులో వ్యక్తిగతీకరించిన, దుష్ప్రభావంలేని క్యాన్సర్ చికిత్సకు ఈ వ్యాక్సిన్ దారి చూపొచ్చు.

అంష్ కోసం మిగిలిన ఒకే అడుగు: రష్యా అనుమతి

ప్రస్తుతం రష్యా ఆరోగ్య మంత్రిత్వ శాఖ అంష్ కేసును పరిశీలిస్తోంది.
అనుమతి లభిస్తే –
అతనికి వెంటనే ట్రయల్ అవకాశమిస్తారు, ఈ వ్యాక్సిన్‌ను పొందే భారతదేశపు తొలి వ్యక్తిగా నిలుస్తాడు.

“నేడు మాకు ఆశ కనిపించింది. మా కుమారుడి భవిష్యత్తుకు ఇది అత్యంత కీలకం”
అని అంష్ తండ్రి మనూ శ్రీవాస్తవ తెలిపారు.